ہیگسیتھ کا دعویٰ، ایران کی فوجی صلاحیتوں کو شدید نقصان پہنچا

اسلام آباد (ویب نیوز) امریکی وزیر دفاع پیٹ ہیگسیتھ نے دعویٰ کیا ہے کہ امریکی افواج نے ایران کی بحریہ، فضائیہ، فضائی دفاع، کمانڈ ڈھانچے اور فوجی صنعتی تنصیبات کو شدید نقصان پہنچایا ہے۔ کوانٹیکو میں امریکی فوجی اہلکاروں سے خطاب کرتے ہوئے انہوں نے کہا کہ امریکی کارروائیوں کا ایک مقصد ایران کو جوہری ہتھیار حاصل کرنے سے روکنا بھی ہے۔ تاہم ایران کی بعض فوجی صلاحیتیں اب بھی برقرار ہیں اور امریکی حکام کے دعووں کی تمام تفصیلات کی آزادانہ طور پر تصدیق نہیں ہوسکی۔ہیگسیتھ نے امریکی محکمہ دفاع میں تنظیم نو کا اعلان کرتے ہوئے خودکار اور روبوٹک جنگی صلاحیتوں کے لیے نئی کمانڈ قائم کرنے اور جنرلز و ایڈمرلز کی تعداد میں مجموعی طور پر 20 فیصد کمی کا منصوبہ بھی پیش کیا۔ ان کے مطابق یہ تبدیلیاں فوجی قیادت میں احتساب اور کارکردگی بہتر بنانے کے لیے کی جارہی ہیں۔