ہزار گنجی فائرنگ میں زخمی پشتونخوا ملی عوامی پارٹی کا کارکن جاں بحق، ملزمان کی گرفتاری کا مطالبہ

کوئٹہ (ویب نیوز): پشتونخوا ملی عوامی پارٹی ضلع کوئٹہ نے ہزار گنجی میں فائرنگ کے واقعے میں زخمی ہونے والے پارٹی کارکن محمد نبی کے انتقال پر گہرے دکھ اور افسوس کا اظہار کرتے ہوئے واقعے میں ملوث ملزمان کی فوری گرفتاری کا مطالبہ کیا ہے۔ پارٹی کے بیان کے مطابق کلی خنائی بابا کے رہائشی محمد نبی چند روز قبل ہزار گنجی میں فائرنگ کے واقعے میں شدید زخمی ہوئے تھے اور ٹراما سینٹر میں زیر علاج تھے، تاہم وہ زخموں کی تاب نہ لاتے ہوئے جاں بحق ہوگئے۔ بیان میں کہا گیا کہ ضلع کوئٹہ، بالخصوص سریاب سرکل میں چوری اور ڈکیتی کی بڑھتی ہوئی وارداتیں باعث تشویش ہیں اور مؤثر کارروائی نہ ہونے سے شہریوں کی جان و مال غیر محفوظ ہو گئی ہے۔ پارٹی نے مطالبہ کیا کہ محمد نبی کے قتل میں ملوث افراد کو فوری گرفتار کرکے قانون کے مطابق سزا دی جائے۔ بیان میں مرحوم کے اہل خانہ سے تعزیت اور اظہارِ ہمدردی بھی کیا گیا۔ (چوروں کے ملوث ہونے اور دیگر الزامات پارٹی کے بیان پر مبنی ہیں۔)