افغانستان اور ترکمانستان کا ٹاپی، ٹاپ، نوری فائبر اور ریلوے منصوبوں پر تیز عملدرامد کے لیے تکنیکی کمیٹی بنانے پر اتفاق

کوئٹہ (ویب نیوز) افغانستان اور ترکمانستان نے ٹاپی، ٹاپ، نوری فائبر اور ریلوے منصوبوں کی نگرانی اور تیز رفتار عملدرامد کے لیے اعلیٰ حکام کی سربراہی میں مشترکہ تکنیکی کمیٹی قائم کرنے پر اتفاق کیا ہے۔ ریاستی وزراء کے اقتصادی معاونت کے مطابق افغانستان کے اقتصادی نائب وزیراعظم ملا عبدالغنی برادر اخوند نے ہرات کے تورغونڈی میں ترکمانستان کے قومی رہنما قربان قلی بردی محمدوف سے ملاقات کی، جس میں ٹاپی منصوبے کی پیش رفت اور دونوں ممالک کے درمیان مستقبل کے مشترکہ اقتصادی تعاون پر تبادلہ خیال کیا گیا۔ ملا برادر نے گیس کی قیمت کے حوالے سے طویل المدتی اور لچکدار معاہدے، ہرات میں گیس کی تقسیم کا نیٹ ورک قائم کرنے، ٹاپی منصوبے کے باقی معاملات حل کرنے کے لیے مشترکہ تکنیکی و قانونی کمیشن تشکیل دینے اور افغان شہریوں کے لیے مزید روزگار کے مواقع پیدا کرنے پر زور دیا۔ انہوں نے ترکمانستان سے بجلی، ٹرانسپورٹ اور ریلوے کے بڑے اقتصادی منصوبوں میں تعاون کی بھی درخواست کی۔ ترکمانستان کے قومی رہنما نے کہا کہ دونوں ممالک کے تعلقات باہمی اعتماد اور اچھے ہمسایہ تعلقات کی بنیاد پر مضبوط ہو رہے ہیں، جبکہ عشق اباد ہرات میں گیس کی تقسیم کے نیٹ ورک اور ٹاپ منصوبے پر عملی کام شروع کرنے کے لیے تیار ہے۔ انہوں نے کہا کہ ترکمان باشی بندرگاہ پر افغان ٹرانزٹ اور تجارتی سامان کے لیے تمام ضروری سہولیات فراہم کی جائیں گی اور لاجورد روٹ کو دوبارہ فعال کرنے کے لیے مشترکہ کوششیں جاری رہیں گی۔ دونوں ممالک نے ٹاپی کے علاوہ ٹاپ، نوری فائبر اور ریلوے منصوبوں پر تیز رفتاری سے عملدرامد کے لیے اعلیٰ حکام کی سربراہی میں تکنیکی کمیٹی قائم کرنے پر اتفاق کیا۔