کوئٹہ میں نمازِ عید کے اجتماعات کے لیے سیکیورٹی ہائی الرٹ، پولیس اور ایف سی کی اضافی نفری تعینات

کوئٹہ (صداقت ویب نیوز)عیدالاضحی کی نماز کے مبارک موقع پر صوبائی دارالحکومت کوئٹہ میں سیکیورٹی کے غیر معمولی انتظامات کرتے ہوئے ہائی الرٹ جاری کر دیا گیا ہے، جبکہ نمازِ عید کے تمام چھوٹے بڑے اجتماعات کو محفوظ بنانے کے لیے شہر بھر میں پولیس، ایف سی اور دیگر قانون نافذ کرنے والے اداروں کے اہلکاروں کی اضافی نفری تعینات کر دی گئی ہے۔ محکمہ پولیس کے مطابق عید کے موقع پر کسی بھی ناخوشگوار واقعے سے نمٹنے کے لیے ایک جامع سیکیورٹی پلان تیار کر لیا گیا ہے اور شہر کے حساس مقامات کی کڑی نگرانی کی جا رہی ہے۔ پولیس کنٹرول روم کے ذرائع نے یو این اے کو بتایا ہے کہ کوئٹہ کی بڑی مساجد، امام بارگاہوں، عید گاہوں اور کھلے مقامات جہاں نمازِ عید ادا کی جائے گی، وہاں پولیس اور ایف سی کے کمانڈوز تعینات کیے گئے ہیں، جبکہ مشکوک افراد پر نظر رکھنے کے لیے سادہ لباس میں ملبوس اہلکاروں کو بھی مختلف علاقوں میں ڈیوٹیاں سونپی گئی ہیں۔سیکیورٹی اداروں نے عید سے ایک روز قبل ہی شہر کے مختلف علاقوں کا دورہ کرتے ہوئے حفاظتی انتظامات، داخلی و خارجی راستوں، پارکنگ ایریاز اور ایمرجنسی رسپانس کا تفصیلی جائزہ لیا ہے۔ پولیس حکام کے مطابق نمازِ عید کے اجتماعات کے دوران واک تھرو گیٹس، میٹل ڈیٹیکٹرز اور جامع چیکنگ کے عمل کو ہر صورت یقینی بنایا جائے گا، جبکہ بم ڈسپوزل اسکواڈ اور اسپیشل برانچ کے اہلکار بھی مختلف مقامات کی کلیئرنس اور نگرانی کریں گے۔ شہر کے داخلی اور خارجی راستوں پر کڑی چیکنگ کے ساتھ ساتھ اہم شاہراہوں پر موبائل گشت میں بھی نمایاں اضافہ کیا گیا ہے۔ اس کے علاوہ، تمام بڑے اجتماعات کی سکیورٹی کلیئرنس ایف سی، پولیس اور اسپیشل برانچ مشترکہ طور پر کریں گے جس کے بعد ہی نمازِ عید ادا کرنے کی اجازت ہوگی۔محکمہ پولیس کی جانب سے جاری کردہ ہدایات کے مطابق، عیدالاضحی کے موقع پر تمام پولیس اہلکاروں اور افسران کی چھٹیاں منسوخ کر دی گئی ہیں اور تمام ایس ایچ اوز کو اپنے اپنے تھانوں کی حدود میں موجود رہنے اور پولیس کنٹرول روم سے لمحہ بہ لمحہ رابطے میں رہنے کا حکم دیا گیا ہے۔ پولیس لائنز اور کنٹرول رومز میں بھی اضافی عملہ تعینات ہے تاکہ کسی بھی ہنگامی صورتحال پر فوری ردعمل دیا جا سکے۔ حساس علاقوں میں سرچ اور کومبنگ آپریشنز کا سلسلہ بھی جاری ہے اور شہر کے اہم مقامات پر سی سی ٹی وی کیمروں کے ذریعے مانیٹرنگ کو مزید مثر بنا دیا گیا ہے۔ دوسری جانب، پولیس حکام نے شہریوں سے بھی اپیل کی ہے کہ وہ نمازِ عید کے دوران سیکیورٹی اداروں کے ساتھ مکمل تعاون کریں اور کسی بھی مشکوک شخص یا لاوارث شے کی صورت میں فوری طور پر قریبی تھانے یا ہیلپ لائن پر اطلاع دیں۔