کابل (ویب نیوز) افغانستان کی آزادی دوبارہ حاصل کرنے کی 107ویں سالگرہ کے موقع پر منعقدہ تقریبات میں افغان حکام نے آزادی کے تحفظ، قومی اتحاد، امن و سلامتی، اقتصادی استحکام اور دنیا کے ساتھ باہمی احترام کی بنیاد پر تعلقات کے فروغ پر زور دیا۔ نائب وزیراعظم برائے اقتصادی امور ملا عبدالغنی برادر نے کہا کہ افغانستان اصولوں کے دائرے میں دنیا کے ساتھ جامع روابط کے لیے تیار ہے اور جن ممالک کے افغانستان کے بارے میں منفی عزائم ہیں انہیں ماضی کی تاریخ سے سبق سیکھنا چاہیے۔ نائب وزیراعظم برائے انتظامی امور مولوی عبدالسلام حنفی نے قومی اتحاد اور سیاسی خودمختاری کے تحفظ پر زور دیتے ہوئے کہا کہ افغان عوام کو بیرونی مداخلتوں کے حوالے سے ہوشیار رہنا چاہیے۔ وزیر داخلہ خلیفہ سراج الدین حقانی نے کہا کہ آزادی اس وقت حقیقی معنی اختیار کرتی ہے جب ملک میں مکمل امن و سلامتی، اقتصادی ترقی، سماجی انصاف اور پائیدار استحکام موجود ہو۔ وزیر خارجہ مولوی امیر خان متقی نے کہا کہ حقیقی آزادی صرف ملک کی سرزمین پر اختیار کا نام نہیں بلکہ خارجہ پالیسی، معیشت اور دیگر شعبوں میں خودمختاری بھی ضروری ہے۔ وزیر دفاع مولوی محمد یعقوب مجاہد نے کہا کہ افغانستان سیاسی، اقتصادی اور فوجی معاملات میں کسی کے حکم پر عمل نہیں کرے گا اور تمام ممالک سے اسلامی امارت کے ساتھ مذاکرات اور تعاون کا مطالبہ کیا۔ حکام نے مخالفین سے بھی اپیل کی کہ وہ محاذ آرائی اور بدامنی کی کوششوں سے باز آئیں اور ملک کے استحکام و ترقی کے لیے اپنا کردار ادا کریں۔
