ہنہ اوڑک میں مسلح جتھوں کی کارروائیاں قابل مذمت، شہریوں کا تحفظ یقینی بنایا جائے: پشتونخوا نیشنل عوامی پارٹی

کوئٹہ (ویب نیوز): پشتونخوا نیشنل عوامی پارٹی نے ضلع ہنہ اوڑک کے علاقوں شاہ نور کچھ، کلی ملک شیر اور کلی راغہ میں مسلح جتھوں اور دہشت گرد عناصر کی جانب سے مارٹر گولے داغنے، شہری آبادی کو نشانہ بنانے اور متعدد گھروں کو نقصان پہنچانے کے واقعات کی شدید مذمت کرتے ہوئے حکومت سے فوری اقدامات کا مطالبہ کیا ہے۔ پارٹی کے صوبائی سیکرٹریٹ سے جاری بیان میں کہا گیا کہ نہتے شہریوں، خواتین، بچوں اور بزرگوں کو خوفزدہ کرنا اور رہائشی علاقوں کو نشانہ بنانا کسی صورت قابل قبول نہیں۔ بیان میں کہا گیا کہ ایسے واقعات سے علاقے میں خوف و ہراس اور عدم تحفظ کی صورتحال پیدا ہو رہی ہے، جبکہ متعلقہ ادارے عوام کے جان و مال کے تحفظ میں ناکام دکھائی دے رہے ہیں۔ پشتونخوا نیشنل عوامی پارٹی نے وفاقی و صوبائی حکومت، ضلعی انتظامیہ اور سکیورٹی اداروں سے مطالبہ کیا کہ واقعات کی شفاف تحقیقات کرکے ملوث عناصر اور ان کے سہولت کاروں کو قانون کے کٹہرے میں لایا جائے اور متاثرہ علاقوں میں مستقل بنیادوں پر حفاظتی اقدامات کیے جائیں۔