ویمنز جونیئر ہاکی ایشیا کپ: پاکستان کو بھارت کے ہاتھوں 0-19 سے بدترین شکست

کوئٹہ (ویب نیوز) چین کے شہر موکی میں جاری ویمنز جونیئر ایشیا کپ 2026 کے کوارٹر فائنل میں دفاعی چیمپئن بھارت نے پاکستان کو یکطرفہ مقابلے میں 0-19 سے شکست دے کر سیمی فائنل میں جگہ بنالی، بھارتی ٹیم نے پہلے ہاف میں 10 گول کیے جبکہ دوسرے ہاف میں مزید 9 گول کرکے پاکستان کو ٹائٹل کی دوڑ سے باہر کردیا۔ بھارت کی جانب سے پوجا ملک نے ہیٹ ٹرک سمیت متعدد گول کیے جبکہ روشنی نے بھی کئی بار گیند جال میں پہنچائی، بھارتی ٹیم نے میچ کے آغاز ہی سے پاکستان پر مسلسل دباؤ برقرار رکھا اور آخری لمحے تک گول کرنے کا سلسلہ جاری رکھا۔ بھارت اس سے قبل گروپ مرحلے میں جاپان، ملائیشیا اور جنوبی کوریا کو شکست دے کر پہلی پوزیشن حاصل کرچکا تھا جبکہ 2023 اور 2024 میں بھی ویمنز جونیئر ایشیا کپ کا ٹائٹل اپنے نام کرچکا ہے۔ سیمی فائنل میں بھارت کا مقابلہ جنوبی کوریا اور ملائیشیا کے درمیان کوارٹر فائنل کی فاتح ٹیم سے ہوگا۔