سپریم لیڈر کی ایرانی حکام کو حوصلہ شکن بیانات سے گریز کی ہدایت

تہران (ویب نیوز): ایرانی سرکاری میڈیا کے مطابق سپریم لیڈر مجتبیٰ خامنہ ای نے حکام کو قومی اتحاد اور عوامی یکجہتی برقرار رکھنے کی ہدایت کرتے ہوئے ایسے بیانات اور سرگرمیوں سے گریز کرنے پر زور دیا ہے جو عوامی حوصلے کو متاثر کریں۔ انہوں نے کہا کہ سماجی ہم آہنگی کو نقصان پہنچانے والی کسی بھی سرگرمی کی اجازت نہیں دی جا سکتی۔ انہوں نے حکومت کی جانب سے بنیادی اشیائے ضروریہ کی فراہمی، جنگ اور دیگر نقصانات سے متاثرہ بنیادی ڈھانچے کی بحالی اور توانائی کے وسائل کے بہتر انتظام کے لیے اقدامات کو سراہا۔ سپریم لیڈر نے مہنگائی اور بے روزگاری پر قابو پانے، درآمدات کو دانش مندی سے منظم کرنے، سرمایہ کاری بڑھانے اور معیشت میں امریکی ڈالر کے کردار کو کم کرنے پر بھی زور دیا۔ ان کا کہنا تھا کہ بیرونی دباؤ اور پابندیوں کے باوجود ملکی پیداوار، داخلی صلاحیتوں اور مؤثر معاشی انتظام کے ذریعے ایران اقتصادی ترقی اور خوشحالی کی جانب آگے بڑھ سکتا ہے۔