سعودی تیل پائپ لائن اور ایف 15 طیاروں کے اڈے کو شدید نقصان

کوئٹہ(ویب نیوز) سیٹلائٹ تصاویر سے انکشاف ہوا ہے کہ گزشتہ ہفتے ہونے والے حملے میں سعودی عرب کی اہم ایسٹ ویسٹ تیل پائپ لائن کے ایک پمپنگ اسٹیشن کو شدید نقصان پہنچا، جس کی مرمت میں ایک ماہ سے زائد وقت لگ سکتا ہے اور عالمی منڈی میں تیل کی قیمتوں میں مزید اضافے کا خدشہ ہے۔ سعودی عرب آبنائے ہرمز کے بجائے بحیرۂ احمر کے راستے خام تیل برآمد کرنے کے لیے اس پائپ لائن پر انحصار کرتا ہے۔ سعودی حکومت نے حملے کا الزام عراق میں ایران کی حمایت یافتہ ملیشیاؤں پر عائد کیا ہے، جبکہ یمن کے حوثیوں نے بھی سعودی عرب پر میزائل اور ڈرون حملے تیز کر دیے ہیں۔ نئی سیٹلائٹ تصاویر کے مطابق حوثیوں کے حملے میں سعودی عرب کے شاہ خالد ایئر بیس کو بھی نقصان پہنچا، جہاں ایف 15 لڑاکا طیارے تعینات ہیں۔ سعودی حکومت نے حوثیوں کے حملوں کا سخت جواب دینے کا اعلان کیا ہے۔