رانا ثناء اللہ نے پی ٹی آئی سے آف دی ریکارڈ مذاکرات کی تصدیق کردی

اسلام آباد (ویب نیوز) وزیراعظم کے مشیر برائے سیاسی امور رانا ثناء اللہ نے تحریک انصاف کے ساتھ آف دی ریکارڈ مذاکرات کی تصدیق کرتے ہوئے کہا ہے کہ پی ٹی آئی بانی کی صحت سے متعلق جو مطالبات عوامی سطح پر کر رہی ہے، وہ ان پس پردہ مذاکرات میں نہیں کرتی۔ جیو نیوز کے پروگرام ’’کیپٹل ٹاک‘‘ میں گفتگو کرتے ہوئے رانا ثناء اللہ نے پی ٹی آئی کے آف دی ریکارڈ مطالبات کو نامناسب اور ہٹ دھرمی پر مبنی قرار دیا اور کہا کہ لانگ مارچ کا طرز عمل کسی حکومت کے لیے قابل قبول نہیں۔ دوسری جانب پروگرام میں شریک پی ٹی آئی رہنما ملک عامر ڈوگر نے کہا کہ ان کی جماعت ایسا کوئی اقدام نہیں کرنا چاہتی جس سے خیبرپختونخوا کی صوبائی حکومت ختم ہوجائے، تاہم ان کے بقول موجودہ حالات میں پارٹی کے پاس کوئی راستہ نہیں۔ انہوں نے کہا کہ پی ٹی آئی نے پُرامن احتجاج کی کال دی ہے اور حکومت سے مطالبات تسلیم کرنے اور حالات کو مزید کشیدہ ہونے سے روکنے کا مطالبہ کیا ہے۔ رانا ثناء اللہ اس سے قبل بھی پی ٹی آئی قیادت کے ساتھ بیک ڈور رابطوں کی تصدیق کرچکے ہیں، جبکہ 27 ستمبر کی ایک رپورٹ میں گزشتہ چار سے پانچ ہفتوں کے دوران نصف درجن سے زائد پس پردہ ملاقاتوں کا بھی ذکر کیا گیا تھا۔