کوئٹہ( سید سردار محمد خوندئی )
ایکسائز اینڈ اینٹی نارکوٹکس ڈیپارٹمنٹ بلوچستان ساؤتھ زون نے بین الاقوامی منشیات مافیا کے خلاف پاکستان کی تاریخ کا سب سے بڑا آپریشن کرتے ہوئے گڈانی کے ساحلی علاقے سے 1,013 کلوگرام خالص آئس برآمد کر لی، جس کی بین الاقوامی مارکیٹ میں مالیت 74.19 ارب روپے بنتی ہے۔
وزیر اعلیٰ بلوچستان میر سرفراز احمد بگٹی، چیف سیکرٹری شکیل قادر خان اور سیکرٹری ایکسائز سید ظفر علی بخاری کی خصوصی ہدایات پر ڈائریکٹر جنرل ایکسائز اینڈ اینٹی نارکوٹکس ساؤتھ زون محمد زمان کی نگرانی میں یہ کارروائی عمل میں لائی گئی۔ اس برآمدگی سے عالمی ڈرگ مافیا کو اربوں ڈالر کا تاریخی نقصان پہنچا ہے۔
گڈانی آپریشن کی تفصیلات
برآمد شدہ منشیات 1,013 کلوگرام خالص کرسٹل میتھ (آئس) ہے، جسے انتہائی مہارت سے سمگل کرنے کی کوشش کی جا رہی تھی۔
دو سالہ کارکردگی کا جائزہ
یہ کارروائی گزشتہ دو برسوں کے دوران ساحلی پٹی پر ہونے والے کامیاب آپریشنز کا تسلسل ہے۔
میگا میرین آپریشن: 425 کلوگرام آئس، 20 کلوگرام چرس اور 5,076 یونٹ غیر ملکی شراب و بیئر برآمد، مالیت 31.35 ارب روپے۔
2۔ بڑی اینٹی نارکوٹکس کارروائی: 200 کلوگرام آئس، 600 کلوگرام چرس اور 8,000 یونٹ غیر ملکی شراب و بیئر برآمد، مالیت تقریباً 28 ارب روپے، جسے عالمی یوم انسداد منشیات پر تلف کیا گیا۔
3۔ دیگر کارروائیاں: مختلف کارروائیوں میں مجموعی طور پر 14,467 یونٹ غیر ملکی شراب و بیئر برآمد کی گئی۔
دو سال کا مجموعی نتیجہ
گزشتہ دو سالوں کے دوران ایکسائز ساؤتھ زون نے مجموعی طور پر 1,638 کلوگرام آئس، 620 کلوگرام چرس اور 27,543 بوتلیں و کین غیر ملکی شراب و بیئر برآمد کیں، جس سے منشیات کارٹلز کو مجموعی طور پر 133.56 ارب روپے کا بین الاقوامی مالی نقصان پہنچا۔
ڈائریکٹر جنرل محمد زمان نے کہا کہ محکمہ ایکسائز منشیات سمگلنگ کے خلاف بلا امتیاز کارروائیاں جاری رکھے گا تاکہ نوجوان نسل کو محفوظ بنایا جا سکے اور ساحلی سرحدوں کا تحفظ یقینی بنایا جا سکے۔
