ظہور بلیدی کا نوکچہ چاغی اور زیارت کراس پشین میں سیکیورٹی فورسز کی کارروائیوں کو خراج تحسین

کوئٹہ (ویب نیوز) صوبائی وزیر منصوبہ بندی ظہور احمد بلیدی نے چاغی کے علاقے نوکچہ اور پشین کے زیارت کراس میں سیکیورٹی فورسز کی کارروائیوں کو سراہتے ہوئے کہا ہے کہ حالیہ پیش رفت اس امر کا ثبوت ہے کہ ریاستی ادارے بلوچستان میں بدامنی پھیلانے کی کوششوں پر کڑی نظر رکھے ہوئے ہیں۔ انہوں نے کہا کہ صوبے میں ترقیاتی عمل، معاشی سرگرمیوں اور معمولات زندگی کو برقرار رکھنے کے لیے محفوظ ماحول بنیادی ضرورت ہے۔ امن کو نقصان پہنچانے والی سرگرمیوں کے خلاف بروقت اقدامات عوام کے تحفظ اور بلوچستان کے مستقبل کے لیے انتہائی اہم ہیں۔ ظہور احمد بلیدی نے کہا کہ چند عناصر تشدد اور خوف کے ذریعے صوبے کے عوام کو یرغمال بنانے کی سوچ رکھتے ہیں، تاہم بلوچستان کے باشعور شہری ایسی کارروائیوں کے سامنے نہیں جھکیں گے۔ انہوں نے سیکیورٹی فورسز کی پیشہ ورانہ کارکردگی کو خراج تحسین پیش کرتے ہوئے کہا کہ ملک کے امن کے لیے خدمات انجام دینے والے اہلکاروں کی قربانیاں قوم کے لیے باعث فخر ہیں۔ انہوں نے کہا کہ بلوچستان کو بدامنی سے نکال کر ترقی، سرمایہ کاری اور خوشحالی کی راہ پر گامزن کرنے کے لیے حکومت اپنی کوششیں جاری رکھے گی اور عوام و ریاستی اداروں کے باہمی تعاون سے امن کے قیام کی منزل مزید قریب لائی جا سکتی ہے۔