بلوچستان میں ترقیاتی بجٹ فنڈز کے اجرا میں تاخیر، متعدد منصوبے متاثر

کوئٹہ (ویب نیوز): بلوچستان میں غیر تنخواہی اور ترقیاتی بجٹ کے فنڈز کے اجرا میں تاخیر کے باعث متعدد ترقیاتی منصوبوں پر کام سست روی کا شکار ہونے یا معطل ہونے کی اطلاعات ہیں۔ ذرائع کے مطابق فنڈز کی عدم دستیابی کے باعث مختلف سرکاری محکمے نئے ترقیاتی اور غیر ترقیاتی اخراجات جاری کرنے سے قاصر ہیں، جس سے صوبے میں ترقیاتی سرگرمیاں متاثر ہو رہی ہیں۔ بعض مبصرین کا کہنا ہے کہ موجودہ سیاسی صورتحال اور حکومت میں ممکنہ تبدیلی سے متعلق قیاس آرائیوں کے باعث فنڈز کے اجرا میں احتیاط برتی جا رہی ہے تاکہ سرکاری وسائل کے ممکنہ بے جا استعمال سے بچا جا سکے، تاہم اس مؤقف کی سرکاری سطح پر کوئی تصدیق نہیں ہوئی۔ دوسری جانب صوبائی حکومت نے بھی تاخیر کی وجوہات پر کوئی باضابطہ وضاحت جاری نہیں کی، جبکہ مالیاتی ماہرین نے حکومت پر زور دیا ہے کہ فنڈز کے اجرا کی صورتحال اور تاخیر کی وجوہات سے متعلق واضح مؤقف اختیار کیا جائے تاکہ محکموں، ترقیاتی اداروں اور عوام میں پائی جانے والی غیر یقینی صورتحال کا خاتمہ ہو سکے۔