حوثیوں کا سعودی عرب میں آرامکو تنصیبات پر میزائل اور ڈرون حملوں کا دعویٰ، ریاض نے حملے ناکام بنانے کا اعلان

کوئٹہ (ویب نیوز) یمن کے حوثی گروپ (انصار اللہ) اور سعودی قیادت میں قائم فوجی اتحاد کے درمیان ایک بار پھر کشیدگی بڑھ گئی ہے۔ حوثیوں نے سعودی عرب کے شہروں ینبع اور جازان میں آرامکو کی تیل تنصیبات پر درجنوں کروز میزائلوں، بیلسٹک میزائلوں اور مقامی طور پر تیار کردہ ڈرونز سے حملوں کی ذمہ داری قبول کرتے ہوئے دعویٰ کیا ہے کہ تمام اہداف کو کامیابی سے نشانہ بنایا گیا۔ دوسری جانب سعودی حکام کا کہنا ہے کہ فضائی دفاعی نظام نے تمام حملوں کو کامیابی سے ناکام بنا دیا اور کسی بڑے نقصان کی اطلاع نہیں ملی۔ یہ صورتحال سعودی عرب کی جانب سے ایک روز قبل یمن کے صوبہ الحدیدہ اور جزیرہ کمران میں حوثیوں کے مبینہ ٹھکانوں پر فضائی حملوں کے بعد سامنے آئی ہے۔ ادھر اقوام متحدہ اور عمان دونوں فریقوں سے کشیدگی کم کرنے اور مذاکرات دوبارہ شروع کرنے کی کوششیں کر رہے ہیں۔ اطلاعات کے مطابق عمان میں ممکنہ مذاکرات کے نئے دور کی تیاری جاری ہے، تاہم حوثیوں نے خبردار کیا ہے کہ اگر یمن کا محاصرہ ختم نہ کیا گیا تو سعودی عرب پر میزائل حملے اور بحری ناکہ بندی جاری رکھی جائے گی اور آرامکو کی تنصیبات بدستور ان کے اہم اہداف رہیں گی۔