ایران کے کویت اور بحرین پر نئے حملے، دبئی میں دھماکوں کی خبروں کی تردید

کوئٹہ (ویب نیوز) آبنائے ہرمز کے تنازع کے تناظر میں ایران اور امریکہ کے درمیان کشیدگی برقرار ہے، جبکہ ایران نے کویت اور بحرین میں اہداف کو نشانہ بنانے کا دعویٰ کیا ہے۔ کویتی فوج کے مطابق جمعرات کو ڈرون حملوں کی نئی لہر کو ناکام بنایا گیا اور اسے ایرانی جارحیت قرار دیا گیا، جبکہ کویت کے دارالحکومت کے قریب دھماکوں کی آوازیں بھی سنائی دیں۔ ایران نے دعویٰ کیا ہے کہ اس نے کویت کے علی السالم فضائی اڈے پر ریڈار، فضائی دفاعی نظام اور ایندھن ذخیرہ کرنے کی تنصیبات کو نشانہ بنایا، جبکہ بحرین میں شیخ عیسیٰ ایئر بیس پر موجود امریکی فوجی تنصیبات کو بھی ہدف بنایا گیا۔ دوسری جانب امریکہ نے جنوبی ایران کے بندر عباس اور جزیرہ قشم پر میزائل حملے کیے، جن پر ایرانی وزیر خارجہ عباس عراقچی نے شدید ردعمل دیتے ہوئے امریکہ پر جنگی جرائم کے الزامات عائد کیے۔ ادھر دبئی حکومت نے شہر کے ڈاؤن ٹاؤن علاقے میں دھماکوں سے متعلق خبروں کی تردید کرتے ہوئے انہیں بے بنیاد قرار دیا اور عوام سے اپیل کی کہ صرف سرکاری ذرائع سے جاری معلومات پر اعتماد کریں اور افواہوں سے گریز کریں۔