کوئٹہ کے علاقے ارباب ٹاون میں جھگیوں میں خوفناک آتشزدگی، 6 ماہ کی معصوم بچی جاں بحق

کوئٹہ (صداقت ویب نیوز)صوبائی دارالحکومت کوئٹہ کے علاقے ارباب ٹاون کے قریب قائم جھگیوں میں اچانک خوفناک آگ بھڑک اٹھی جس کے نتیجے میں ایک 6 ماہ کی معصوم بچی جھلس کر جاں بحق ہو گئی، جبکہ متعدد جھگیاں اور لاکھوں روپے مالیت کا گھریلو سامان جل کر خاکستر ہو گیا۔ واقعے کے بعد پورے علاقے میں کہرام مچ گیا اور متاثرہ خاندان شدید غم و صدمے سے نڈھال ہو گئے۔ ذرائع کے مطابق آگ اچانک نمودار ہوئی اور دیکھتے ہی دیکھتے تیزی سے پھیل گئی۔ جھگیوں میں لکڑی، کپڑے، پلاسٹک اور دیگر آتش گیر سامان موجود ہونے کے باعث آگ نے چند ہی لمحوں میں کئی جھونپڑیوں کو اپنی لپیٹ میں لے لیا۔ واقعے کے وقت جھگیوں میں خواتین اور بچے موجود تھے جنہوں نے چیخ و پکار کرتے ہوئے باہر بھاگ کر اپنی جانیں بچائیں۔عینی شاہدین کے مطابق آگ اس قدر شدید تھی کہ لوگوں نے ابتدائی طور پر اپنی مدد آپ کے تحت اسے بجھانے کی کوشش کی، تاہم تیز شعلوں اور سیاہ دھوئیں کے باعث صورتحال بے قابو ہو گئی۔ اطلاع ملتے ہی فائر بریگیڈ کی گاڑیاں اور امدادی ٹیمیں فوری طور پر موقع پر پہنچ گئیں اور آگ پر قابو پانے کے لیے بڑے پیمانے پر کارروائی شروع کر دی گئی۔ ریسکیو ذرائع کے مطابق آتشزدگی کے دوران ایک 6 ماہ کی بچی جھگی کے اندر ہی پھنس گئی جو شدید جھلسنے کے باعث موقع پر ہی دم توڑ گئی۔ امدادی کارکنوں نے بچی کی لاش کو تحویل میں لے کر ہسپتال منتقل کر دیا ہے۔ فائر بریگیڈ حکام کے مطابق آگ بجھانے کے عمل میں متعدد گاڑیوں نے حصہ لیا، جبکہ قریبی آبادی کو بھی حفاظتی طور پر الرٹ کر دیا گیا تھا۔ ابتدائی اطلاعات کے مطابق آگ لگنے کی حتمی وجہ تاحال معلوم نہیں ہو سکی ہے، تاہم شارٹ سرکٹ یا کھانا پکانے کے دوران چولہے سے آگ بھڑکنے کے امکانات ظاہر کیے جا رہے ہیں۔