پنجاب کے مختلف شہروں میں سی ٹی ڈی آپریشنز، حکام کے مطابق 13 مشتبہ شدت پسند گرفتار

پنجاب (صداقت ویب) محکمہ انسدادِ دہشت گردی (سی ٹی ڈی) نے دعویٰ کیا ہے کہ پنجاب کے مختلف شہروں میں کارروائیوں کے دوران 13 مشتبہ شدت پسندوں کو گرفتار کیا گیا ہے۔ ترجمان سی ٹی ڈی کے مطابق یہ آپریشنز لاہور، ساہیوال، ملتان، جہلم، منڈی بہاؤالدین، جھنگ، چنیوٹ اور میانوالی میں کیے گئے۔ حکام کے مطابق لاہور سے مختار نامی ایک مبینہ خطرناک شدت پسند کو بھی حراست میں لیا گیا جبکہ گرفتار افراد سے دھماکا خیز مواد، آئی ای ڈی اور ڈیٹونیٹر برآمد ہونے کا دعویٰ کیا گیا ہے۔ سی ٹی ڈی کا کہنا ہے کہ زیرِ حراست افراد مبینہ طور پر قانون نافذ کرنے والے اداروں کے دفاتر کو نشانہ بنانے کی منصوبہ بندی کر رہے تھے، تاہم ان دعوؤں کی آزادانہ تصدیق سامنے نہیں آئی۔