کوئٹہ،اے این ایف کی بلیلی کے قریب بڑی کارروائی، گاڑی سے 84 کلوگرام چرس برآمد، ایک اسمگلر گرفتار

کوئٹہ(ویب نیوز) انسدادِ منشیات فورس (اے این ایف)نے صوبائی دارالحکومت کوئٹہ کے مضافاتی علاقے بلیلی کے قریب ایک بڑی اور کامیاب کارروائی کرتے ہوئے کار سے 84 کلوگرام اعلی معیار کی چرس برآمد کر لی ہے، جبکہ موقع سے ایک بین الصوبائی منشیات اسمگلر کو بھی رنگے ہاتھوں گرفتار کر لیا گیا ہے۔ اے این ایف کے ذرائع کے مطابق، حکام کو خفیہ اطلاع ملی تھی کہ منشیات کی ایک بڑی کھیپ گاڑی کے ذریعے منتقل کرنے کی کوشش کی جا رہی ہے، جس پر اے این ایف کی ٹیم نے بلیلی کے مقام پر ناکہ بندی کر کے مشکوک گاڑی کو روکا اور اس کی تفصیلی تلاشی لی۔گاڑی کے خفیہ خانوں کی تلاشی کے دوران اِن میں چھپائی گئی 84 کلوگرام چرس برآمد ہوئی، جسے قبضے میں لے کر کارروائی کے دوران گاڑی میں موجود ملزم کو فوری طور پر حراست میں لے لیا گیا۔ اے این ایف حکام کا کہنا ہے کہ برآمد ہونے والی منشیات کی عالمی مارکیٹ میں مالیت لاکھوں روپے بنتی ہے؛ ملزم کے خلاف انسدادِ منشیات ایکٹ کے تحت باقاعدہ مقدمہ درج کر کے اس کے نیٹ ورک کے دیگر اراکین کی گرفتاری اور مزید تفتیش کے لیے تحقیقات کا آغاز کر دیا گیا ہے۔