منګۍ بند پمپنګ اسٹیشن پر دہشت گرد حملہ؛ تحقیقاتی کمیشن نے پولیس کی چار رکنی رابطہ کمیٹی مقرر کردی

کوئٹہ (ویب نیوز) ضلع زیارت کے منگۍ بند پمپنگ اسٹیشن پر ہونے والے دہشت گرد حملے کی تحقیقات کے لیے قائم تحقیقاتی کمیشن، جس کی سربراہی جسٹس محمد عامر نواز رانا کر رہے ہیں، نے کھلی عدالت میں کیس کی سماعت کی۔ سماعت کے دوران پولیس کی جانب سے شفیق الرحمن، ایڈیشنل ایڈووکیٹ جنرل (لیگل)، سی پی او کوئٹہ کمیشن کے سامنے پیش ہوئے اور بلوچستان پولیس کے انسپکٹر جنرل کی جانب سے یکم ستمبر 2026 کو جاری کردہ حکم نامہ پیش کیا، جو تحقیقاتی کمیشن کے 27 اگست 2026 کے حکم پر عملدرآمد کے لیے جاری کیا گیا تھا۔ حکم کے مطابق پولیس کی جانب سے چار رکنی رابطہ کمیٹی تشکیل دی گئی ہے جس میں پرویز خان عمرانی، ڈی آئی جی سبی رینج، شفیق الرحمن، ایڈیشنل آئی جی پی لیگل و سی پی او کوئٹہ، سید فاضل بخاری، ایس ایس پی انویسٹی گیشن سی ٹی ڈی بلوچستان اور عبد المالک درانی، ڈی ایس پی/ایس پی زیارت شامل ہیں۔ یہ رابطہ کمیٹی پولیس کی نمائندگی کرتے ہوئے تحقیقاتی کمیشن کی کارروائی کی مکمل نگرانی اور پیروی کرے گی۔ سماعت کے دوران زیارت کے ڈی ایس پی/ایس پی نے کمیشن کو بتایا کہ دہشت گردوں کے خلاف گھیرا تنگ کیا جا رہا ہے اور پولیس دہشت گردوں کے خلاف بھرپور توانائی اور مؤثر حکمت عملی کے ساتھ کارروائیاں کر رہی ہے۔ اس موقع پر متعدد ریکارڈ شدہ گواہان بھی تحقیقاتی کمیشن کے سامنے پیش ہوئے اور اپنے بیانات قلمبند کرائے۔ تحقیقاتی کمیشن کی مزید کارروائی 9 ستمبر 2026 بروز بدھ دوپہر ایک بجے تک ملتوی کردی گئی۔