پی ایم اے بلوچستان کے صوبائی انتخابات مکمل، پروفیشنل ڈاکٹرز فورم کے عہدیداران بلامقابلہ منتخب

کوئٹہ (ویب نیوز) پاکستان میڈیکل ایسوسی ایشن (پی ایم اے) بلوچستان کی صوبائی شاخ کے انتخابی کمیشن نے پی ایم اے بلوچستان صوبائی انتخابات 2026 کا انتخابی عمل مکمل کرتے ہوئے کامیاب امیدواروں کا باضابطہ اعلان کردیا۔ پی ایم اے بلوچستان کے انتخابات پانچ سال سے زائد عرصے کے تعطل کے بعد منعقد ہوئے، جنہیں صوبے کی طبی برادری کے لیے ایک اہم جمہوری پیش رفت قرار دیا جارہا ہے۔ پاکستان میڈیکل ایسوسی ایشن کی مرکزی کونسل کے 12 جولائی 2026 کے نوٹیفکیشن کے تحت تشکیل دیے گئے پانچ رکنی صوبائی انتخابی کمیشن نے آئین، متعلقہ اصولوں اور ضوابط کے مطابق انتخابی عمل مکمل کیا۔ انتخابات میں پروگریسو ڈاکٹرز الائنس اور پروفیشنل ڈاکٹرز فورم کے دو پینلز نے کاغذات نامزدگی جمع کرائے تھے، تاہم 5 ستمبر 2026 کو پروگریسو ڈاکٹرز الائنس نے اپنے تمام امیدواروں کے کاغذات نامزدگی پروفیشنل ڈاکٹرز فورم کے حق میں واپس لے لیے، جس کے بعد پروفیشنل ڈاکٹرز فورم واحد پینل رہ گیا اور انتخابی کمیشن نے ڈاکٹر نعیم زرکون کو صدر، ڈاکٹر عبدالجبار سومرو کو صدر منتخب، ڈاکٹر زرک خان کو جنرل سیکرٹری، ڈاکٹر نور اللہ موسیٰ خیل اور ڈاکٹر سیمین گل کو نائب صدور، ڈاکٹر محمد اسلم اور ڈاکٹر احمد عباس کو جوائنٹ سیکرٹریز، ڈاکٹر عبداللہ وردگ کو پریس سیکرٹری، ڈاکٹر طارق بلوچ کو فنانس سیکرٹری اور ڈاکٹر ارشاد بلوچ کو چیئرمین فیلڈ آپریشنز بلامقابلہ منتخب قرار دے دیا۔ مذکورہ عہدیداران پی ایم اے کے آئین اور متعلقہ قواعد و ضوابط کے تحت دو سال کے لیے منتخب ہوئے ہیں اور ان کی مدتِ عہدہ 12 ستمبر 2026 سے شروع ہوگی۔ انتخابی کمیشن نے انتخابی عمل میں حصہ لینے والے تمام امیدواروں اور پینلز کا شکریہ ادا کرتے ہوئے پروگریسو ڈاکٹرز الائنس کی جانب سے اپنے پینل سے دستبرداری کے فیصلے کا احترام کیا۔ کمیشن نے امید ظاہر کی کہ نو منتخب عہدیداران پی ایم اے کے آئین، اصولوں، ضوابط اور انتظامی روایات کے مطابق اپنی ذمہ داریاں ادا کرتے ہوئے صوبے کی طبی برادری کے لیے مؤثر کردار ادا کریں گے۔ انتخابی کمیشن کے مطابق انتخابی عمل مکمل ہونے کے ساتھ کمیشن کی ذمہ داریاں بھی اختتام پذیر ہوگئی ہیں، جبکہ نئی کابینہ اپنے آئینی اختیار کے تحت مستقبل کی پالیسی، ترجیحات اور پروگرام کے حوالے سے اپنا لائحہ عمل خود پیش کرے گی۔