سرانان میں مسلح گروہوں کے ہاتھوں بے گناہ مزدوروں کا قتل قابل مذمت ہے، افغان قومی تحریک

کوئٹہ (ویب نیوز) افغان قومی تحریک (اے کیو ایم) نے ایک صوبائی بیان میں پشین کی تحصیل سرانان میں گزشتہ ایک ہفتے کے دوران پیش آنے والے مسلسل واقعات اور مسلح گروہوں کی جانب سے علاقے کا محاصرہ کرنے کے بعد بے گناہ مزدوروں کے قتل کی شدید مذمت کی ہے۔ اے کیو ایم نے کہا کہ پشتون وطن کو بے یار و مددگار سمجھنا اور علاقے میں خوف و دہشت پھیلانے کی سازش ناقابل قبول ہے۔ ان کے مطابق ایسے واقعات حکومتی رٹ کی کمزوری، خراب سیکیورٹی صورتحال اور حکومت، سول انتظامیہ و متعلقہ سرکاری اداروں کی سنگین ناکامی کا واضح ثبوت ہیں۔ بیان میں کہا گیا کہ مسلح گروہوں کے مسلسل واقعات پشتونوں اور بلوچوں کے درمیان اختلاف اور تصادم پیدا کرنے کی خطرناک سازش ہیں اور دونوں اقوام کے ذمہ دار رہنماؤں کو ایسے اقدامات کی روک تھام کے لیے اپنا کردار ادا کرنا چاہیے۔ افغان قومی تحریک نے کہا کہ حکومت اور متعلقہ اداروں کو سرانان کے محاصرے سے متعلق بروقت اطلاعات ملنے کے باوجود کئی گھنٹوں تک مؤثر کارروائی نہ کرنا حکومتی ناکامی کا واضح ثبوت ہے۔ اے کیو ایم نے متعلقہ اداروں سے مطالبہ کیا کہ سرانان میں پیش آنے والے مسلسل واقعات کی غیر جانب دارانہ تحقیقات کی جائیں، ملوث عناصر کو گرفتار کرکے قانون کے حوالے کیا جائے اور قومی شاہراہوں سمیت پورے علاقے میں امن و امان کی صورتحال بہتر بنائی جائے تاکہ عوام بلا خوف اپنی زندگی گزار سکیں۔