کوئٹہ کے علاقے وحدت کالونی میں گھریلو ناچاقی پر شوہر نے مبینہ طور پر بیوی اور چار بچوں کو قتل کرنے کے بعد خودکشی کر لی

کوئٹہ (ویب نیوز)صوبائی دارالحکومت کوئٹہ کے علاقے وحدت کالونی کے قریب ایک انتہائی دلخراش اور افسوسناک واقعہ پیش آیا ہے، جہاں پولیس حکام کے مطابق ایک شخص نے مبینہ طور پر خونی کھیل کھیلتے ہوئے اپنی بیوی اور چار معصوم بچوں کو بیدردی سے قتل کرنے کے بعد خود کو بھی گولی مار کر اپنی زندگی کا خاتمہ کر لیا۔ ہولناک واقعے کی اطلاع ملتے ہی پولیس کی بھاری نفری فوری طور پر جائے وقوعہ پر پہنچ گئی اور علاقے کو گھیرے میں لے کر لاشوں کو ہسپتال منتقل کیا، جہاں کرائم سین سے ضروری شواہد اکٹھے کر کے واقعے کی ہر پہلو سے باقاعدہ تحقیقات کا آغاز کر دیا گیا ہے۔ ابتدائی طور پر واقعے کے اصل محرکات سامنے نہیں آ سکے ہیں تاہم پولیس حکام کا کہنا ہے کہ وجوہات جاننے کے لیے تفتیش کا دائرہ وسیع کر دیا گیا ہے۔دوسری جانب، وزیر داخلہ بلوچستان میر ضیا اللہ لانگو نے وحدت کالونی میں باپ کے ہاتھوں مبینہ طور پر اہلیہ اور چار کمسن بچوں کے قتل اور خودکشی کے اس لرزہ خیز واقعے کا سخت نوٹس لے لیا ہے۔ انہوں نے آئی جی پولیس بلوچستان اور کمشنر کوئٹہ سے واقعے کی تفصیلی رپورٹ طلب کرتے ہوئے ہدایت کی ہے کہ 24 گھنٹوں کے اندر تحقیقاتی رپورٹ پیش کی جائے۔ وزیر داخلہ نے پولیس حکام کو واقعے کی انتہائی شفاف اور جزیات کے ساتھ جانچ کرنے کا حکم دیتے ہوئے واضح کیا کہ اس لرزہ خیز واقعے کی ہر پہلو سے مکمل تحقیقات کی جائیں اور فرائض کی ادائیگی میں کسی بھی قسم کی غفلت یا لاپرواہی کو ہرگز برداشت نہیں کیا جائے گا۔