سید سردار محمد خوندئی (صداقت ویب سائٹ)
کوئٹہ پاکستان کسٹمز نے اسمگلنگ کے خلاف ایک بڑی اور تاریخی کارروائی کرتے ہوئے تقریبا ساڑھے چار ارب روپے مالیت کے ضبط شدہ غیر ملکی اور ممنوعہ سامان کو نذرِ آتش کر دیا۔ تلف کیے جانے والے سامان کو 64 ٹرکوں کے ذریعے سخت سکیورٹی میں تلفی کے مقام تک پہنچایا گیا۔اس موقع پر چیف کلیکٹر بلوچستان کسٹمز مسعود، کلیکٹر کسٹمز شاہد جان اور سیکرٹری ایکسائز بلوچستان بھی موجود تھے، جبکہ سامان کی منتقلی اور تلفی کے دوران کسٹمز پولیس اور فرنٹیئر کور(ایف سی)کے اہلکاروں نے سخت حفاظتی انتظامات سنبھالے رکھے کسٹمز حکام کے مطابق تلف کیے گئے سامان میں مختلف اقسام کی غیر ملکی اشیا، ممنوعہ سامان اور اسمگل شدہ مصنوعات شامل تھیں، جو مختلف کارروائیوں کے دوران ضبط کی گئی تھیں۔ سامان کو مقررہ قانونی تقاضے پورے کرنے کے بعد آگ لگا کر مکمل طور پر تلف کیا گیا اس موقع پر میڈیا سے گفتگو کرتے ہوئے کلیکٹر کسٹمز شاہد جان نے کہا کہ پاکستان کسٹمز اسمگلنگ کے خاتمے اور قومی معیشت کے تحفظ کے لیے پرعزم ہے۔ انہوں نے کہا ان شا اللہ ہر ماہ اربوں روپے مالیت کے غیر قانونی، اسمگل شدہ اور ممنوعہ سامان کو تلف کیا جائے گا تاکہ غیر قانونی تجارت کی حوصلہ شکنی ہو اور ملکی صنعت و کاروبار کو تحفظ فراہم کیا جا سکے انہوں نے مزید کہا کہ اسمگلنگ کے خلاف جاری مہم کو مزید مثر بنایا جا رہا ہے اور قانون نافذ کرنے والے اداروں کے تعاون سے غیر قانونی کاروبار میں ملوث عناصر کے خلاف سخت کارروائیاں جاری رہیں گی سیکرٹری ایکسائز بلوچستان نے بھی اس موقع پر کسٹمز کی کارروائی کو سراہتے ہوئے کہا کہ اسمگلنگ کے خاتمے کے لیے تمام متعلقہ ادارے مشترکہ حکمت عملی کے تحت کام کر رہے ہیں اور غیر قانونی کاروبار میں ملوث عناصر کے خلاف کارروائیاں مزید تیز کی جائیں گی کسٹمز حکام کا کہنا ہے کہ ایسی کارروائیاں نہ صرف قومی خزانے کو نقصان پہنچانے والی اسمگلنگ کی روک تھام میں مددگار ثابت ہوں گی بلکہ قانونی تجارت کے فروغ اور ملکی معیشت کے استحکام میں بھی اہم کردار ادا کریں گے۔
